Giatiman ug gi-assist sa Zamboanga del Norte Medical Team ang 12 ka pasyente nga gidala ngadto sa Cebu City niadtong Agosto 18 aron makadawat og espesyalisadong pagtambal ug operasyon pinaagi sa suporta ni Governor Darel Dexter T. Uy.
Upat ka pasyente ang malampusong na-admit sa Vicente Sotto Memorial Medical Center, lakip ang mga pasyenteng adunay brain tumor, spine condition nga nanginahanglan og operasyon, severe anemia ug lung condition nga gikatakdang operahan. Usa pa ka pasyente gikan sa Situbo, Osmeña ang na-admit sa Southwestern University Medical Center pinaagi sa suporta ni Congressman Pinpin Uy.
Personal usab nga giuban ug giatiman ni Zamboanga del Norte Medical Team Head Herdina Gallegos ang mga pasyente atol sa ilang biyahe ngadto sa Cebu aron matabangan ug matultolan sila sa ilang mga panginahanglan.
Ang maong misyon kabahin sa padayong medical assistance sa Zamboanga del Norte Medical Team alang sa mga pasyenteng nanginahanglan og espesyalisadong serbisyo medikal nga dili dayon mahatag sa probinsya.(JENIFFER JR. DELICA)
Source: Zamboanga del Norte Medical Team