Anaa na sa kamot sa kapulisan ang usa ka suspek sa pagposil patay kang Barangay Kapitan Leopoldo “Dodoy” Atad sa Macleodes Polanco, kaniadtong Marso 25, 2025.
Mao kini ang gibutyag ni PNP Provincial PCOL Rainier Diaz atol sa press conference didto sa Zamboanga del Norte Police Provincial Office (ZNPPO) nga nahimotang sa Camp Hamac Sicayab Dipolog City.
Matud ni PCOL Diaz nga ang suspek didto na nila nadakpan sa Tambulig, Zamboanga del Sur atol sa ilang gehimo nga hot pursuit operation.
Sumala pa nga human sa insidente dali gilayon nga gipalihok sa kapulisan ang ilang intel operatives maong ilang nasundan ang tunob sa suspetsado.
Ang director sa PNP nagdumili usa sa paghatag sa pangalan sa ilang nadakpan tungod sa ilang padayon nga imbestigasyon apan iyang gipaniguro nga ang ilang dinakpan aduna gayoy kalambigitan sa pag-ihaw kang Kapitan Dodoy Atad.
Padayon usab ang ilang pagpangita sa mga kauban sa nadakpan nga suspek.
Gikonsiderar sa kapulisan ang tanang anggulo o motibo sa pagpatay ug wala gisalikway ang kabahin sa politika ilabina nga nagsingabot na ang piniliay karong Mayo 12, 2025.
Samtang ang kaabin sa politika ni Kapitan Dodoy Atad nga si Dapitan City Mayor Seth Frederick “Bullet” Jalosjos atoa usab nitambong sa Press Conference.
Ang mayor sa Dapitan una na nga nipasalig nga iyang tabangan ang pamilya sa ilang giila nga lig-ong lider sa politika sa pagkab-ot sa hinanaling hustisya. (Angelica T. Obina)
(Source: BANAT MINDANAO)