Malipayong nadawat sa 120 ka senior citizens ang ilang ₱10,000 pesos cash gift matag usa atol sa gipahigayong seremonya sa Plenary Hall, Zamboanga del Norte Convention and Exhibition Center, Hulyo 8, 2025.
Gilangkuban ang mga benepisyaryo sa 93 ka Octogenarians ug 27 ka Nonagenarians nga sakop sa Republic Act 11982, ang balaod nga naghatag pinansyal nga ayuda sa mga senior citizens nga miabot sa 80 anyos, 85 anyos, 90 anyos, 95 anyos ug 100 anyos. Usa ka centenarian usab ang nadawat sa iyang ₱100,000 pesos cash gift.
Gipasiugdahan ang maong kalihukan sa National Commission of Senior Citizens (NCSC-RO-9), kauban ang Office of the Senior Citizens Affairs (OSCA), ug ang City Social Welfare and Development Office (CSWDO) sa koordinasyon sa Lokal nga Kagamhanan sa Dipolog.
Gitambongan kini nila Governor Darel Dexter T. Uy, City Councilor Hon. Praxides P. Rubia nga nirepresentar kang City Mayor Roberto Y. Uy, ug City Councilor Dr. Ryan Niel Asprer. Apil usab sa mga mitambong sila OSCA Head Mr. Sancen D. Caroro, CSWDO Officer Mr. Patrick S. Jalapadan, mga kawani ug mga representante sa NCSC nga maoy nangulo sa pagpangapod-apod sa cash gift.
Gipasabot sa kalihukan nga ang RA 11982 usa ka lakang sa gobyerno aron ipakita ang dakong pagtagad ug pag-ila sa kaambit sa mga senior citizens sa katilingban.
Giawhag usab ang ubang senior citizens nga gusto makapahimulos sa maong programa nga mobisita sa OSCA office sa Barangay Sta. Isabel, Dipolog City alang sa dugang kasayuran ug proseso sa aplikasyon.(Jumalisa Papa)
Source: Dipolog City Government