Dako nga paglaum ang gidala sa mokabat sa ₱25 milyones nga kantidad sa medical supplies ug nagkadaiyang kagamitan nga opisyal nga giturn-over ngadto sa Provincial Government of Zamboanga del Norte pinaagi sa Goods Donation Program nga gipahigayon sa Mega Home, Barangay Sicayab.
Kini nga donasyon resulta sa panagtambayayong sa Child International Philippines Inc., Zamboanga del Norte Association of Illinois (ZAMNAI), Dipolog Youth Club (DYC Dipolog ug Chicago), Batchmates ’82 sa Chicago, ug sa probinsyal nga pangagamhanan.
Sa ceremonial turn-over, nadawat sa lain-laing benepisyaryong ahensya ang mga donasyon lakip ang Department of Education–Dipolog, Provincial Social Welfare and Development Office (PSWDO), Provincial Health Office (PHO), ug Zamboanga del Norte Medical Center (ZNMC).
Lakip sa mga gipanghatag mao ang libo-libong kahon sa bandage, medical kits, school bags, micronutrient supplements, N95 masks, dental instruments, hospital supplies sama sa surgical gowns ug medical devices, ingon man social service items. Nakadawat usab ang Dipolog Youth Club og toothbrushes, reading glasses ug backpacks nga ipanghatag sa kabataan sa nagkadaiyang barangay.
Sa mensahe ni Darel Dexter T. Uy nga gipaabot ni Dr. Esmeralda A. Nadela, hospital administrator sa ZNMC, iyang gipahayag ang dakong pagpasalamat sa mga organisasyon ug mga Zanortehanon nga bisan anaa sa laing nasud, padayon nga naghatag og suporta sa ilang probinsya.(IKEN B. GULLEM)
Source: Zamboanga del Norte Provincial News Network