Cebu City- Gihangyo ni Kalihim Teodoro Locsin Jr. sa Department of Foreign Affairs ang kagamhanang panlalwigan sa Cebu nga tugtan ang mga langyaw pagsud sa probinsiya aron makasakay sa repatriation flights sa tugpahanan sa Maktan.
Kini sa tinguha nga makalikay ang nasod sa posibleng panimalos sa ubang nasod sa umaabot ilabi na sa natad sa industriya sa turismo.
Sa kutay sa iyang mga Tweet kagahapon, si Locsin miingon nga ang airport sa Cebu lisod sudlon sa mga evacuees.
Una niini, giagni ni Gob. Gwendolyn Garcia ang MCIAA ug DOT 7 nga hunongon ang pag-facilitate sa entry sa mga langyaw sa probinsya kay gi-ban pa ang pagsud niini gikan sa ubang lalawigan.
Gimando usab ni Garcia ang pag-undang ang pagpasud sa mga pasahero samtang gipaubos pa ang Cebu sa ECQ kun enhanced community quarantine tungod sa hulga sa Covid 19.
Pero gipasabot ni Locsin sa iyang Tweet nga daghan pang langyaw ang natanggong sa Palawan, Siargao, Dumaguete, Iloilo, Bohol, Caticlan, Surigao, Tacloban, Mindanao ug Bacolod nga buot manukad sa Cebu ug Manila sa ilang pagpamauli.
Midugang si Locsin nga kinahanglang makapauli ang mga langyaw para sa kaayohan sa turismo sa nasod.
