Cebu City – Pabor ang Department of Education o DepEd-7 sa pagpatuman sa face-to-face classes sa mga tunghaang publiko sa limitadong gidaghanon sa mga tinun-an sugod sa mga dapit nga minos ra og risgo sa COVID-19.
Una niini, ang League of Municipalities in the Philippines o LMP-Cebu Chapter miduso og resolution sa National IATF o Inter-Agency Task Force nga nag-awhag kang Presidente Rodrigo Duterte pag-consider sa implementation sa limited face-to-face classes.
Si Director Salustiano Jimenez sa DepEd 7 mitataw nga ang proposal nag gikan gyod kaniya nga iyang gisumitir sa regional IATF ug giendosar sa national level.
Matod ni Jimenez, mitumaw ang maong lakang dihang nakadawat siyag 160 ka resolution gikan sa PTA o Parents Teachers Association ug sa mga LGUs o Local Government Units nga misugyot sa pagpatuman sa limitadong face-to-face classes.
Nunot niini, nagpatawag siyag miting sa mga superintendent sa lainlaing dibisyon ug ilang nakab-ot ang proposal ug gipresentar sa regional IATF.
Midugang siya nga ang unahon sa maong lakang ang mga lugar nga walay natalang kaso sa Coronavirus Disease sama sa mokabat sa usa ka libo ka tunghaan sa bukid ug islang barangay. (Jhon Tadlip/JTY, photo courtesy of DepEd Tayo Region VII)
(Source: DepEd-7)
