Cagayan de Oro City – Bukas karon ang Department of Education-Region 10 sa pagpanghire sa mga learning facilitators o job order ngadto na sa aid learners. Mao kini ila nakita sa dry run diha sa paggamit sa mga modules sa panimalay tungod kay daghan sa mga ginikanan nga naglisod pag-assist, matud pa ni DepEd-10 Assistant Regional Director Gracia, Jr atol sa usa ka press conference kagahapong adlawa.
Matud pa ni Gracia, ang paghire sa mga facilitators dili kini imposible tungod sa makabuhong nga suporta sa ilang local government units pinaagi sa ilang special education fund. Sa kabahin sa teachers assistance, gibutyag ni Gracia nga otorisado na sila paggamit sa ilang August Maintenance ug uban pang Operating Expenses for procurement of materials alang sa pagtuon susama na lang sa bond papers ug modules, hinuon gipasabot nga dili kini mopasigo sa gikinahanglan sa tanang magtutudlo.
Gibutyag nga adunay mga LGU’s ang miabaga sa galastuhan alang sa reproduction sa modules samtang adunay uban nga naglisod gayod sa pagkuha sa assistance. Mao nga ang ubang magpatudlo nangayog boluntaryong tabang sa nagkalain-laing stakeholders apil na susama pananglit sa mga kalihokan sa Brigada Eskwela.
Kabahin sa kasamtangang gidaghanon sa mga magtutudlo sa rehiyon 10, gisugilon ni Garcia nga aduna kini igong gidaghanon. Sa gidangatan sa mga private school teachers nga nawad-an sa trabaho, matud pa ni Gracia nga mahimo silang mo-apply sa DepEd isip learning facilitators.
Ang pagbukas sa klase alang sa SY 2020-2021 sa mga pampublikong tunghaan gitakda sa Oktubre 5. (PIA-10)