Unom ka buwan ang ultimatum nga gihatag ni DENR Secretary Roy Cimatu sa tanang mga Regional Directors aron paglimpyo sa mga kasapaan ubos sa ilang mga hurisdiksyon. Gipadayag kini sa DENR Secretary atol sa iyang pagtambong sa pagbukas sa 4th International River Summit nga gipahigayon sa Radisson Blu, Cebu City.
Sa interview sa mga tigbalita gibutyag ni Cimatu nga mohimo siya og ocular inspection sa tanang mga kasapaan sa nasud human sa unom ka buwan aron pagtino kon gituman ba ang iyang kasugo-an sa mga Regional Directors bahin sa river cleanup drive. Matud sa DENR Secretary hatagan sa recognition ug ganti ang mga Regional Directors nga makapakita sa maayong accomplishments samtang mag-atubang og sanctions ang mapakyas pagtuman sa iyang kasugoan.
Matud ni Cimatu nga ibutang ubos sa evaluation process ang tanang mga Regional Directors human sa unom ka buwan ug posible nga mapalagpot sa pwesto kadtong mga Regional Director nga mapakyas pagpalambo sa kondisyon sa mga kasapaan nga ubos sa ilang mga hurisdiksyon. Gitataw ni Cimatu nga responsibilidad sa DENR ang pagpa-uswag ug pagpahiuli sa orihinal nga kondisyon sa mga kasapaan sa nasud.
Ang DENR Secretary maoy nangulo sa ribbon-cutting ceremony sa pagbukas sa 4th International River Summit. Ang Mandaue City government maoy host sa 4th International River Summit inabagan sa League of Cities of the Philippines ug sa DENR-River Basin Control Office.
Ang rehabilitasyon sa Butuanon River nga nahimutang sa dakbayan sa Mandaue, usa ka highly urbanized city sa Cebu Province maoy sentro sa sunod-sunod nga plenary ug break-out sessions sa tulo ka adlaw nga International Summit nga matapos sa Sabado, Nobyembre 24, 2018.