KAPALONG, DAVAO DEL NORTE β Nadakpan sa mga kapulisan sa Kapalong ang usa ka kanhing high-ranking nga miyembro sa Communist Terrorist Group (CTG) nga wanted tungod sa kasong paglapas sa Anti-Child Abuse Law sayong buntag niadtong Biyernes, Mayo 22, 2026.
Gipahigayon ang operasyon ubos sa Simultaneous Anti-Criminality Law Enforcement Operations (SACLEO), kabahin sa padayon nga kampanya sa Philippine National Police (PNP) batok sa kriminalidad.
Gipangulohan sa Kapalong Municipal Police Station (MPS) ubos ni Police Captain Crisanto S. Quibrar, DCOP, kauban ang mga operatiba gikan sa 1st Davao del Norte Provincial Mobile Force Company (DNPMFC), Davao del Norte Police Intelligence Division Management Unit (DNPIDMU), ug Davao del Norte Provincial Intelligence Unit (DNPIU), ang pagpatuman sa warrant of arrest batok sa suspek nga nailhang si alias βKhan.β
Gikaso ang maong suspek tungod sa paglapas sa Republic Act 7610 o Special Protection of Children Against Child Abuse, Exploitation and Discrimination Act.
Matud sa kapulisan, gigamit sa mga operatiba ang alternative recording device atol sa pagserbisyo sa warrant ug gipahibalo usab sa suspek ang iyang Miranda Rights sa pinulongang iyang nasabtan.
Sumala ni PMAJ Bryle F. Patalinghug, Chief of Police, nagpakita ang operasyon sa lig-on nga koordinasyon tali sa kapulisan ug militar aron mapanubag sa balaod ang mga naglapas niini, ilabi na sa mga kaso nga naglakip sa kabataan.
Sa pagkakaron, anaa na sa kustodiya sa 25th Infantry Battalion (25IB), 10th Infantry Division (10ID), Philippine Army sa Camp Kalaw, Monkayo, Davao de Oro ang nadakpan nga suspek alang sa booking ug dokumentasyon samtang naghulat sa hustong disposisyon sa korte. .(Camille Santos Naraga)(Source: Cotributed)