PANABO CITY – Duha ka gidudahang tulak sa ilegal nga droga nga giila nga High Value Individuals (HVI) ang nadakpan sa buy-bust operation nga gihimo sa kapulisan sa Barangay New Visayas, Panabo City niadtong Mayo 22, 2026.
Ang mga suspek usa ka 23-anyos nga babaye ug 34-anyos nga lalaki nga parehong taga-Davao City.
Ang operasyon gipahigayon sa Panabo City Police Station ubos sa pagmando ni PLTCOL Dexter R. Cuevas, inubanan sa mga operatiba gikan sa DNPDEU-DNPIU, 2nd Davao del Norte Provincial Mobile Force Company (DNPMFC), ug PDEA Davao del Norte.
Nadakpan ang duha human mapalitan sa poseur buyer og gituohang shabu atol sa transaksyon. Narekober gikan sa ilang posesyon ang tulo ka sachet sa gidudahang shabu nga adunay total nga gibug-aton nga 57 gramos ug balor nga mokabat sa Php 387,600 pinasikad sa Standard Drug Price (SDP).
Gidala sa kustodiya sa Panabo City Police Station ang mga nadakpan ug giandam na ang kasong paglapas sa Republic Act 9165 o Comprehensive Dangerous Drugs Act of 2002. .(Camille Santos Naraga)(Source: Cotributed)