Nasakmit sa Bureau of Customs (BOC) ang gibanabana nga ₱35.4 milyon kantidad sa imported nga mga produktong agrikultural atol sa inspeksyon ug operasyon sa usa ka cold storage facility sa Nueva Ecija niadtong Hunyo 1, 2026.
Ang operasyon gipangulohan ni BOC Commissioner Ariel F. Nepomuceno uban ni National Bureau of Investigation (NBI) Director Melvin Matibag, kauban ang mga personahe gikan sa BOC Intelligence Group, Customs Intelligence and Investigation Service–MICP, NBI, ug Philippine Coast Guard.
Base sa mga report, gilusad ang operasyon human sa mga alegasyon bahin sa agricultural smuggling ug posibleng paglapas sa mga balaod sa customs.
Atol sa inspeksyon, nakumpiska sa mga awtoridad ang daghang kantidad sa sibuyas ug ahos nga giingong gikan sa China ug Netherlands. Tungod niini, gipagawas ang usa ka warrant of seizure and detention batok sa mga produkto tungod sa giingong paglapas sa Customs Modernization and Tariff Act.
Sumala sa BOC, kabahin kini sa padayon nga kampanya sa gobyerno aron mapalig-on ang food security sa nasud ug mapugngan ang agricultural smuggling nga makaapekto sa lokal nga industriya sa agrikultura.
Padayon usab ang imbestigasyon sa mga otoridad aron matino ang responsibilidad sa importer ug sa ubang mga indibidwal nga posibleng nalambigit sa maong kalihokan.(Camille Santos Naraga)(Source: Contributed)