DAKONG kantidad sa gituohang marijuana vape cartridges ang nasakmit sa hiniusang operasyon sa Philippine Drug Enforcement Agency Regional Office 11 (PDEA RO11) ug National Bureau of Investigation Southeastern Mindanao Regional Office (NBI SEMRO) nga misangpot usab sa pagdakop sa usa ka gituohang big-time drug pusher sa Davao City.
Ang buy-bust operation gilusad alas 5:10 sa buntag sa Hulyo 11, 2026 sa ikaduhang andana sa usa ka balay sa Durian Street, Juna Subdivision, Matina Crossing, Davao City, ubos sa Regional Special Enforcement Team-Davao City Office sa PDEA.
Ang nadakpan giila lamang sa alyas “Cebastian,” 22 anyos, ulitawo ug residente sa Panabo City. Sumala sa PDEA, nadakpan siya human gituohang namaligya og usa ka pakete sa vape cartridges nga gisuspetsahang adunay marijuana oil ngadto sa usa ka poseur-buyer sa kantidad nga ₱3,000.
Human sa operasyon, narekober sa mga operatiba ang 39 ka vape cartridges nga gisuspetsahang adunay marijuana oil nga adunay gibanabanang street value nga ₱1.6 milyon. Apil usab sa mga ebidensyang nasakmit ang gimarkahang buy-bust money nga gigamit sa transaksyon.
Gidala ang suspetsado ngadto sa kustodiya sa PDEA alang sa hustong dokumentasyon ug disposisyon sa mga ebidensya.
Giapil na usab sa mga awtoridad ang pag-andam sa kasong paglapas sa Republic Act No. 9165 o ang Comprehensive Dangerous Drugs Act of 2002 batok sa nadakpan nga suspetsado.(Camille Santos Naraga)(Source: PDEA Region XI)