Nasikop sa kapulisan ang suspetsadong responsable sa pagpamusil-patay sa usa ka welder sa Pioneer Avenue, Barangay Magugpo West, Tagum City, pipila lamang ka oras human sa nahitabong krimen pinaagi sa gilusad nga hot pursuit operation.
Ang biktima, nga giila sa alyas “Nardo,” usa ka ulitawo ug residente sa Marilog District, Davao City, namatay human mapusilan sa wala nga bahin sa tiyan. Bisan pa sa dali nga pagdala kaniya sa ospital, gideklarar siyang patay sa mga doktor tungod sa grabeng samad nga iyang naangkon.
Sa imbestigasyon sa pulisya, nasayran nga ang biktima ug ang iyang mga kauban una nang miadto sa usa ka tindahan aron mopalit og ilimnon, diin nahitabo ang komprontasyon tali kaniya ug sa laing lalaki. Human niini, mibalik ang biktima sa maong tindahan aron mopalit og tambal alang sa samad sa iyang tuhod.
Usa ka testigo nga giila sa alyas “Leo” mipahayag nga samtang naglakaw sila sa Pioneer Avenue, kalit silang giduolan sa suspek nga giila sa alyas “Randy,” 35 anyos, pintor ug residente sa Barangay Mankilam, Tagum City. Matud pa sa testigo, wala na’y dugang estorya nga nahitabo kay gilayon sa suspek og kuha sa iyang pusil ug gipusil ang biktima.
Pinaagi sa mga impormasyong nakolekta sa follow-up investigation, gilusad sa Tagum City Police Station, uban sa nagkadaiyang yunit sa Davao del Norte Police Provincial Office, ang hot pursuit operation nga misangpot sa pagdakop sa suspek sa iyang pinuy-anan sa Villa Magsanoc, Barangay Mankilam, alas 9:32 sa buntag sa maong adlaw.
Narekober usab sa operasyon ang usa ka Colt MK IV caliber .45 pistol nga adunay magasin nga puno sa lima ka buhing bala, nga gituohang gigamit sa pagpamusil.
Giapil na sa kapulisan ang pag-andam sa kasong kriminal batok sa nadakpan nga suspek, samtang nagpadayon ang lawom nga imbestigasyon aron matino ang tinuod nga motibo sa krimen.
Gipasalig usab sa Tagum City Police Station nga magpadayon ang ilang kusog nga kampanya batok sa kriminalidad ug ang paspas nga pagresponde sa mga insidente aron masiguro ang kalinaw ug kaluwasan sa komunidad.(Camille Santos Naraga)(Source: Contributed)