DAVAO CITY — Usa ka unexploded ordnance o vintage bomb ang nakit-an sa kanal ilawom sa coastal road sa Purok 22, Malamboon, Caparida Compound, Barangay 76-A, Bucana, Davao City, bandang alas 12:00 sa udto niadtong Huwebes, Disyembre 11, 2025.
Sumala sa kapulisan, mga bata ang unang nakadiskubre sa maong bomba ug gisulayan pa kini og hapak ug dukdok, sa pagtuo nga mapanguwartahan. Human nila masayran ang posibleng katalagman, ilang gi-report ang insidente ngadto sa barangay functionary nga si Roel Tizon, nga dayon mitawag sa kapulisan.
Gi-secure dayon sa mga pulis ang palibot ug gi-cordone ang lugar aron malikayan ang kadaut. Gitubag usab dayon sa City Explosive and Canine Unit–Davao City Police Office (CECU-DCPO) ang insidente ug sila ang nagkustodiya sa maong vintage bomb.(Camille Santos Naraga)(Source: Contributed)