Davao de Oro – Naabtan pa sa mga miresponding pulis sa Montevista Municipal Police Station ang suspek nga naa sa crime scene nga naghupot og kutsilyo nga nagbarog duol sa biktima nga nagkadugo ug nakahigda sa kalsada sa Purok 2, Barangay San Jose, Montevista, Davao de Oro.
Gidakop dayon sa mga pulis ang suspek nga giila nga si Rene Talisic Goc-ong, 45 anyos, mag-uuma ug residente sa nahisgutang lugar samtang giila usab sa mga kapulisan ang biktima nga si JB Imba Mawang, 26 anyos, taga Purok 5, Barangay Lebanon, Montevista.
Subay sa report sa kapulisan, nag-inum ang suspek ug iyahang igsoon dihang miabot ang biktima nga nagdala og kutsilyo ug deritso dunggab kang Goc-ong apan wala makaigo ug nailog niini ang kutsilyo ug maoy gidunggab ngadto sa biktimang si Mawang.
Nadala pa sa hospital si Mawang, apan bandang pasado alas 9:20 sa kagabii namatay kini.
Sa karon, nakakustodiya na sa Montevista Municipal Police Station ang giingong suspek. (Camille Santos Naraga)
(Source: Montevista MPS | PIO PRO-XI)