BANSALAN, Davao del Sur — Naaresto ang 62-anyos nga dating sundalo nga nailhan nga alyas “Nestor” nga residente sa Purok Avocado, Barangay Kinuskusan, Bansalan, sa checkpoint sa utlanan sa Bansalan-Makilala tungod sa pagdala og armas.
Nahitabo ang insidente human makig-lalis ang ex-army nga pasahero sa konduktor sa bus bahin sa pamasahe, ug nasiplatan sa konduktor ang usa ka pistola sa sling bag sa suspek.
Tungod sa kahadlok, giilog sa konduktor ang pusil, mikanaug sa bus, ug misakay og pedicab padulong sa checkpoint aron mangayo og tabang sa kapulisan.
Naaresto ang suspek, ug nasakmit ang .45-caliber nga pistola ug magazine nga adunay pito ka bala. Nahitabo ang pagdakop niadtong Biyernes, Disyembre 12, 2025, mga alas 3:40 sa hapon.(Camille Santos Naraga)(Source: Contributed)