DAVAO DEL NORTE — Gidakop sa kapulisan ang tulo ka lalaki human sila masakpi sa giingong pagpangawat og scrap metal sa Barangay La Filipina ning siyudad, gabii sa Mayo 27, 2026.
Giila ang mga suspetsado pinaagi sa ilang mga alyas nga “Edwito,” 40 anyos; “Florencio,” 32 anyos; ug “Anthony,” 25 anyos. Silang tanan residente sa Purok Vipatel, Barangay Magugpo West, Tagum City.
Sa report sa kapulisan, usa ka caretaker nga giila sa alyas “Jerry,” 49 anyos, maoy nakakita sa mga suspetsado nga nagkuha og mga scrap metal gikan sa propiedad ni alyas “Reynaldo” mga alas 6:00 sa gabii
Tungod niini, gilayon niyang gipahibalo ang mga otoridad nga maoy misangpot sa pagresponde sa Mobile Patrol 726 ug pagdakop sa mga suspetsado.
Gidala dayon ang mga nadakpan sa Tagum City Police Station alang sa hustong disposisyon ug pag-atubang sa kasong theft.(Camille Santos Naraga)(Source: Contributed)