DAVAO CITY – Nasikop sa hiniusang operasyon sa mga sakop sa Maa Police Station 16, 1st City Mobile Force Company ug Criminal Investigation and Detection Group DDOPFU ang usa ka lalaki nga gilista isip Top 5 Most Wanted Person sa regional level.
Ang suspek, nga giila lamang sa alyas nga “Dioscoro,” 58 anyos, nadakpan sa Purok 2, Sitio Mojon, Barangay Langub, Davao City alas 8:12 sa buntag niadtong Hunyo 4, 2026.
Sumala sa kapulisan, adunay warrant of arrest batok sa akusado tungod sa upat ka kaso sa statutory rape ug duha ka kaso sa sexual abuse ug acts of lasciviousness.
Ang maong warrant of arrest gipirmahan ni Judge Dante Baguio, Presiding Judge sa RTC Branch 12, 11th Judicial Region sa Davao City.
Walay girekomendang piyansa ang korte alang sa upat ka kaso sa statutory rape, samtang gitakda sa ₱540,000 ang piyansa alang sa mga kaso sa sexual abuse ug acts of lasciviousness.
Sa pagkakaron, anaa na sa kustodiya sa Maa Police Station 16 ang nadakpan nga wanted person samtang naghulat sa dugang legal nga proseso. (Camille Santos Naraga)(Source: Contributed)