Nadakpan sa mga otoridad ang Top 1 Regional Most Wanted Person sa Davao Region atol sa usa ka operasyon batok sa wanted persons nga gipahigayon sa Barangay Agdao Proper, Davao City niadtong Hulyo 6.
Ang 32-anyos nga suspek nasikop sa Cabaguio Avenue pinaagi sa hiniusang operasyon sa Tracker Team sa Sta. Ana Police Station, sa Criminal Investigation and Detection Group (CIDG), ug uban pang police support units.
Ang pagdakop gihimo pinaagi sa pagpatuman sa Warrant of Arrest nga giisyu sa Regional Trial Court sa Davao City alang sa kasong murder. Wala usab gitugotan og piyansa ang maong kaso.
Human sa pagdakop, gipahibalo sa suspek ang rason sa iyang pag-aresto ug ang iyang mga katungod subay sa balaod, sa wala pa siya gidala sa kustodiya sa Sta. Ana Police Station aron atubangon ang hustong legal nga proseso.
Sumala sa Philippine National Police (PNP), kabahin kini sa ilang padayon nga kampanya batok sa mga wanted persons pinaagi sa lig-on nga intelligence operations ug legal nga pagpatuman sa balaod aron mapaatubang sa hustisya ang mga naglikay sa responsibilidad.(Camille Santos Naraga)(Source: Contributed)