TAGUM CITY — Gidakop sa kapulisan ang tulo ka lalaki human masakpi sa giingong pagpangawat og mga electrical wire sa Barangay Canocotan, sayong kadlawon sa Mayo 16, 2026.
Ang mga nadakpan giila sa mga alias nga “Ron,” 33 anyos; “Lodz,” 31 anyos; ug “Boy.” Matud pa sa kapulisan, ang una usa ka lineman samtang ang duha kauban niya mga electrician. Tanan sila residente sa Davao area.
Sa inisyal nga imbestigasyon, nasuta nga nasakpan mismo sa akto ang mga suspek samtang nagkuha og mga kable gikan sa poste sa kuryente nga nahimutang duol sa Toyota Tagum alas 4:39 sa kadlawon.
Gidala dayon sila sa Mobile Patrol 5 ngadto sa Tagum City Police Station alas 8:30 sa buntag alang sa hustong disposisyon.
Mipahigayon usab og reklamo ang Local Government Unit sa Tagum City batok sa mga suspek nga karon anaa na sa kustodiya sa kapulisan ug nag-atubang og kasong theft.(Camille Santos Naraga)(Source: Contributed)