Nasikop sa kapulisan ang usa ka 46-anyos nga lalaki nga nailhang alyas “Mago” human ma-implementar ang search warrant sa iyang pinuy-anan sa Barangay Madaum, Tagum City pasado alas 12:44 sa hapon niadtong Hulyo 18, 2026.
Ang operasyon gipahigayon sa Tagum City Police Station uban sa mga sakop sa Police Drug Enforcement Unit (PDEU), Station Drug Enforcement Unit (SDEU), ug Davao del Norte Police Provincial Office (DNPPO) SWAT, subay sa Search Warrant nga gipagawas sa Executive Judge sa Regional Trial Court, 11th Judicial Region, Branch 30.
Sa maong operasyon, narekober ang tulo ka heat-sealed transparent plastic sachets nga adunay sulod sa gituohang shabu, usa ka asul nga lighter, ug usa ka brown nga sunglass pouch nga giingong adunay kalabotan sa kaso.
Sumala sa kapulisan, ang nakumpiskang gituohang shabu adunay gibanabanang timbang nga 3 ka gramo ug balor nga ₱20,400 pinasikad sa Standard Drug Price.
Ang suspetsado anaa na sa kustodiya sa Tagum City Police Station ug atubangon ang kasong paglapas sa Section 11, Article II sa Republic Act 9165 o Comprehensive Dangerous Drugs Act of 2002.(Camille Santos Naraga)(Source: PNP Tagum CPS)