Davao City – Himas rehas ang usa ka lalaking suspek human kining namusil sa usa ka babae pump attendant sa usa ka gas station sa Lower Binugao, Barangay Binugao, Toril District.
Giila ni Police Major Carol Jabagat, Station Commander sa Toril Police Station ang suspek nga si Renato Rio Jr., alyas JR, 27-anyos kanhi Tanker driver sa Petro Gazz ug residente sa Brgy. Bago Aplaya Talomo District.
Subay sa report, miabot ang suspek sa Petro Gazz Gasoline station ug nakalalis niini ang usa sa mga pumpboy nga si Michael Ejada dayon miadto sa quarter sa mga empleyado ug gipusil ang biktimang si Rosa Mae Ajeno 22-anyos igo sa tiyan niini.
Human sa insidente daling misibat ang suspek sakay sa usa ka Toyota Innova color Silver gray samtang ang biktima daling gidala sa balay tambalan.
Sa karon, magatubang ug kasong frustrated murder ang giingong dinakpan. (Camille Santos Naraga)
(Source: Toril Police Station)