DAVAO CITY — Nasikop ang usa ka lalaki human kining nanulis ug cellphone sa usa ka call center agent sa Sandawa Road.
Giila kini nga si alyas “Gerwin,” 26 anyos, residente sa Padada, Davao del Sur.
Base sa ulat sa kapulisan, kalit lang gikuha sa suspek ang cellphone sa biktima ug misulay sa pag-ikyas. Apan migukod ang biktima ug nanawag og tabang nga nakadani sa mga bystanders sa lugar, nga maoy hinungdan sa pagdakop sa suspek.
Human madakpan, gi-endorso ang suspek ngadto sa nag-roving nga mga pulis. Nabawi gikan kaniya ang Android mobile phone nga gibanabana og kantidad nga P10,000.
Sa karon, anaa na sa kustodiya sa Davao City Police Office ang suspek alang sa hustong pag-file sa kaso. (Camille Santos Naraga)(Source: Contributed)