Usa ka lalaki ang nasikop sa gilusad nga anti-illegal drugs operation sa Kapalong, Davao del Norte, human siya masakpi sa giingong paglapas sa Republic Act 9165 o ang Comprehensive Dangerous Drugs Act of 2002.
Sa report sa kapulisan, narekober gikan sa suspetsado ang gidudahang shabu ug usa ka armas nga gitumbok nga baril. Ang tanang narekober nga ebidensya gilayon nga gidokumento ug gipailalom sa forensic examination aron magamit sa padayong imbestigasyon.
Human sa operasyon, gidala ang suspetsado sa estasyon sa kapulisan alang sa booking ug pagproseso sa kasong ipasaka batok kaniya. Padayon usab nga gisuta sa mga otoridad kung adunay balidong lisensya ang narekober nga armas.
Gibutyag sa kapulisan nga ang maong operasyon kabahin sa ilang gipakusgan nga kampanya batok sa ilegal nga droga ug sa tanang matang sa kriminalidad sa lalawigan.
Giawhag usab sa Philippine National Police ang publiko nga magpabiling alerto ug makigtambayayong sa mga awtoridad pinaagi sa pagreport sa mga gidudahang ilegal nga kalihokan aron mapalig-on ang kalinaw ug kaluwasan sa komunidad.(Camille Santos Naraga)(Source: DNPPO)