Davao del Sur — Patay ang usa ka rider human ma-overshoot ang gimaneho niyang motorsiklo ug milahos sa basakan kaganihang alas 4:00 sa kaadlawon, Disyembre 12, 2025, sa Purok Bird of Paradise, Barangay La Suerte, Matanao, Davao del Sur.
Sumala sa inisyal nga imbestigasyon sa Matanao Municipal Police Station, ang biktima giila nga si Ryan Manonag, 37 anyos, lumad sa Kiblawan, Davao del Sur. Pauli na unta siya sa ilang panimalay sa Barangay Bangkal, Matanao, sa dihang pag-abot sa kurbada nga kalsada, nawala siya sa kontrol sa manobela ug na-overshoot ang motorsiklo.
Milahos ang biktima sa tubigan nga bahin sa basakan, diin gidudahan sa kapulisan nga posible siyang naka-inom ug nalamba pa sa bato, hinungdan nga nahulom sa tubig ang iyang ulo.
Nagpahimangno ang kapulisan sa publiko nga magsuot gyud kanunay og helmet sa pagmaneho og motorsiklo ug likayan ang pagbiyahe kung naka-inom aron malikayan ang susamang mga insidente.(Camille Santos Naraga)(Source: Contributed)