DAVAO DEL SUR — Naaresto ug gilakip sa prisuhan sa Digos City Police Station ang usa ka pulis nga suspetsado sa pagpamusil ug pagpatay sa iyang live-in partner sulod sa ilang balay sa Purok 11, Bonifacio Bataan St., Barangay Zone 3, Digos City, Domingo sa gabii, Agosto 31, 2025.
Ang suspek, usa ka 30-anyos nga Patrolman nga nakadestino sa Hagonoy Municipal Police Station (MPS), giingong lango sa ilimnon sa dihang miuli ug nakiglalis sa biktima nga si Mealjoy Basilgo Lapeña, 30 anyos, usa ka virtual assistant.
Sa kainit sa panaglalis, mibunot og pistola ang suspek ug gipusil ang biktima sa makapila ka beses nga hinungdan sa pagkamatay niini. Naapil usab sa insidente ang inahan sa biktima, 50 anyos, nga nag-antos og samad ug dali nga gidala sa ospital.
Human sa krimen, misulay og dagan ang suspek apan nadakpan dayon sa kapulisan. Narekober sa crime scene ang 10 ka basiyo sa bala ug pito ka deformed fired bullets.(Camille Santos Naraga)(Source: Contributed)