DAVAO CITY — Nakasikop ang mga otoridad sa usa ka 40-anyos nga PUJ driver nga giilang si alyas “Mulot”, residente sa Barangay Buhangin, human kini maaktuhan nga nagbaligya sa usa ka kinawat nga motorsiklo online niadtong Hulyo 17, 2025.
Sumala sa report sa Talomo Police Station, sayo sa buntag nakadawat sila og reklamo gikan sa biktima nga si alyas Meldy, nga nawagtangan sa ilang Suzuki Raider samtang nakaparada sa Bangkal.
Human sa reklamo, dali nga gipalapdan sa kapulisan ang impormasyon ug hulagway sa motor.
Sa alas 11:00 sa buntag, nakadawat og impormasyon ang Buhangin Police Station nga adunay motor nga susama sa kinawat ang gibaligya sa social media.
Sa coordinated operation tali sa Talomo ug Buhangin Police Stations uban ang City Intelligence Unit (CIU), gilusad ang operasyon nga misangpot sa pagkadakop sa suspek ug pagkarekober sa motor.
Sa interogasyon, miangkon si Mulot nga adunay pa siya’y tulo ka laing motorsiklo nga una na niyang gikawat, ug gitudlo usab niya kung asa kini gitaguan.
Narekober sa kapulisan ang tanang tulo ka motorsiklo. Sa pagkakaron, nakakulong na ang suspek samtang nagpadayon ang imbestigasyon sa posible pa niyang kalambigitan sa ubang kaso sa pagpangawat.