DAVAO CITY – Nasikop ug karon balhug sa prisohan ang usa ka PUJ driver nga giilang si alyas Mulot, 40 anyos, residente sa Barangay Buhangin, Davao City, human kini maaktuhan nga ginabaligya online ang usa ka kinawat nga motorsiklo niadtong Hulyo 17, 2025.
Sumala sa report sa Talomo Police Station, sayo sa buntag nakadawat sila og reklamo gikan kang alyas Meldy, kinsa mitaho nga nawagtang ang ilang Suzuki Raider samtang giparking sa usa ka lugar sa Bangkal.
Tungod sa reklamo, dali nga gipakatap sa kapulisan ang hulagway ug mga timailhan sa nawalang motorsiklo.
Sa alas 11:00 sa buntag, nakadawat og pahibalo ang Buhangin Police Station nga nakita sa social media ang maong motorsiklo nga ginabaligya.
Pinaagi sa hiniusang operasyon sa Talomo ug Buhangin Police Stations, kauban ang City Intelligence Unit (CIU), natultulan ang lokasyon sa suspek ug nadakpan kini.
Sa imbestigasyon, miangkon si Mulot nga adunay pa siyay laing tulo ka motorsiklo nga una na niyang gikawat, ug iyang gitudlo ang dapit kung asa kini gitaguan. (Camille Santos Naraga)(Source: Contributed)