DAVAO CITY – Gi-kumpirma sa Philippine National Police (PNP) nga nagpagula ang Mandaluyong Regional Trial Court Branch 279 og mga warrant of arrest batok sa kanhi PCSO General Manager ug retired police colonel Royina Garma ug upat pa ka tawo tungod sa pagpatay ni PCSO board secretary Wesley Barayuga niadtong 2020.
Lakip sa gi-orderan dakpon niadtong Setyembre 13, 2025 mao sila: Lt. Col. Santie Mendoza, retired police colonel Edilberto Leonardo, ug dismissed police officers Nelson Enriquez Mariano ug Jeremy “Toks” Causapin. Giatubang nila ang kaso sa murder ug frustrated murder nga walay piyansa.
Gisugo ni PNP acting chief Lt. Gen. Jose Melencio Nartatez ang paspas nga pagpatuman sa mga warrant. Matod ni PNP spokesperson Brig. Gen. Randulf Tuaño, nagpabilin nga at-large si Garma ug ang uban, gawas ni Mendoza nga anaa na sa kustodiya.
Base sa ulat, gi-deport si Garma gikan sa U.S. human siya dili hatagan og political asylum ug midiretso sa Malaysia karong buwana. Mitugot usab siya nga motestigo sa atubangan sa International Criminal Court (ICC) batok sa kanhi presidente Rodrigo Duterte.
Ang kaso naggikan sa testimonya ni Mendoza nga naglangkob kang Garma ug Leonardo sa pagpatay kang Barayuga atol sa congressional inquiry kabahin sa drug war ni Duterte. (Camille Santos Naraga)(Source: Contributed)