DAVAO CITY— Gikumpirma sa Magpet Police ang pagkadiskubre sa usa ka gi-abandonang pick-up truck nga may kargang mga sako sa bugas ug mga sample ballots sa Sitio Lobas, Barangay Amabel, alas 10:00 sa buntag, Mayo 10—duha ka adlaw una ang eleksyon
Gisugdan ang imbestigasyon pinaagi sa mando ni PMaj Adulsalam Mamalinta Jr., hepe sa Magpet Police Station. Positibo nga nakita sa lugar ang maong pick-up truck nga walay tao nga mitug-an sa pagpanag-iya niini. Gidala dayon kini sa police station alang sa further investigation.
Pinaagi sa coordination sa Land Transportation Office (LTO), napangalanan ang tag-iya sa sakyanan nga usa ka kandidato sa pagkakonsehal sa Magpet. Bisan pa man, wala may nadokumento nga aktuwal nga pagpanghatag og bugas o sample ballots, busa temporaryong gi-release sa kapulisan ang sakyanan ug kargamento ngadto sa maong kandidato.
Tungod sa insidente, hugtanong nagpahimangno ang kapulisan sa mga kandidato ug katawhan nga likayan ang bisan unsang porma sa pagpanghatag o vote buying karong election period. Giila kini nga usa ka election offense nga may katumbas nga silot sa balaod.
Nanawagan usab si PMaj Mamalinta Jr. sa mga residente sa Magpet nga magmatngon ug ipahibalo dayon sa kapulisan o sa COMELEC ang bisan unsang kalihokan nga naglakip sa pagpanghatag og bugas, pagkaon, o kuwarta. Gipasalig niyang dali nila kining pagatubagon ug lihukon. (Camille Santos Naraga)(Source: Contributed)