DIGOS CITY, Davao del Sur — Nadakpan sa kapulisan sa Digos City ang suspetsado nga si alyas “Reymart”, 34 anyos, residente sa Zone 3, Digos City, nga giila usab nga usa ka photo journalist, human masangkot sa kaso sa carnapping.
Base sa report sa Digos City PNP, nakaparking ang kotse sa biktima nga si alyas “Cristita”, 63 anyos, sa gawas mismo sa iyang balay bandang alas-10:00 sa buntag, Setyembre 30, 2025. Anaa pa ang susi sa sakyanan sa dihang misulod siya sa sulod sa balay.
Pagbalik sa biktima, iyang nadiskobrehan nga nawala na ang sakyanan, busa gipaabot dayon niya kini sa kapulisan.
Dayon nga naglunsad og dragnet operation ang Digos PNP ug sulod lamang sa kapin usa ka oras, narekober ang kotse sa Del Pilar, Tandang Sora Street, Zone 3, Digos City ug nasikop sab ang giingong suspetsado.
Ang sakyanan gibutang na sa kustodiya sa kapulisan alang sa documentation, samtang giandam na usab ang kasong carnapping batok kang “Reymart” nga isumiter sa piskalya pinaagi sa inquest proceedings.(.(Camille Santos Naraga)(Source: Contributed)