DAVAO CITY – Usa ka pampasaherong bus ang nadisgrasya sa National Highway paingon sa Poblacion, Malita, Davao Occidental niining Huwebes, Mayo 1, 2025.
Sumala sa inisyal nga report, nawad-an og preno ang maong bus samtang giliko kini sa drayber. Tungod niini, mitakilid ang sakyanan apan napugngan ang pagkahulog sa kalsada kay naigo kini sa usa ka kahoy.
Gikan sa datos sa PDRRMO Davao Occidental, napulo ug duha (12) ka pasahero ang nangaangol sa maong insidente. Gidali silang giatiman ug gidala sa Malita Women’s and Children’s Wellness Center (MWCWC) alang sa medikal nga pagtabang.
Nagpadayon ang imbestigasyon sa mga otoridad aron matino ang tinuod nga hinungdan sa aksidente.(Camille Santos Naraga)(Source: Contributed)