DAVAO CITY – Duha ka persona ang namatay sa usa ka pamamaril sa Purok 6, Barangay Lanao, Kidapawan City niadtong hapon sa Enero 4, 2026. Ang mga biktima sakay sa usa ka sakyanan dihang gitambangan sa wala pa mailhing mga armadong lalaki.
Gikilala sa kapulisan ang drayber nga si Romel Pason Canson, usa ka kanhing K9 handler ug residente sa Kanapia Subdivision. Siya namatay dayon sa lugar human maigo sa daghang bala sa lawas.
Ang iyang kauban nga si Crystylmae Taniongon Nuñez, residente sa River Park Subdivision, gidala pa sa ospital apan gideklarar nga dead on arrival sa mga doktor.
Base sa paunang imbestigasyon, sakay ang mga biktima sa usa ka Mitsubishi Mirage ug nagabiyahe gikan sa Purok Mangosteen padulong sa Barangay Balindog sa dihang kalit silang gipusil. Ang mga suspek dayong mitakas sakay sa usa ka itom nga Nissan Almera padulong sa direksyon sa Barangay Balindog.
Dayon nga mitubag ang mga pulis, lakip ang SWAT Team, ug naghimo og ocular inspection sa lugar sa insidente. Padayon ang manhunt operation batok sa mga salarin samtang nangayo og tabang ang mga awtoridad sa publiko aron makuha ang hustisya sa kamatayon sa duha ka biktima. (Camille Santos Naraga)(Source: Contributed)