DAVAO CITY — Gibanabanang P8.6 milyon ang kantidad sa mga smuggled nga sigarilyo, ilegal nga droga, ug armas nga nasakmit sa usa ka operasyon sa kapulisan sa usa ka warehouse sa Purok 19, Cabanes Road, Barangay Ilang, Davao City, sa gabii sa Hulyo 3, 2025.
Sumala sa mga otoridad, wala madakpi ang giingong tagdumala sa maong warehouse nga giila lamang sa alyas “Jom”, human kini nakasibat sa dihang miabot ang kapulisan.
Sa maong operasyon, narekober ang 431 ka master cases sa mga smuggled nga sigarilyo, usa ka itom nga sling bag nga adunay sulod nga Armscor caliber .45 pistol nga may usa ka magazine ug pito ka bala, ug duha ka sachet sa gituohang shabu nga gibanabana og kantidad nga P5,000.
Gibutyag sa mga otoridad nga ang maong operasyon gimugna base sa intelligence report kabahin sa illegal nga kalihukan sa maong lugar.
Ang mga nasakmit nga sigarilyo gibalikatan sa kustodiya sa Bureau of Customs – Port of Davao, samtang ang armas ug iligal nga droga anaa karon sa kapulisan isip ebidensiya alang sa ipasang-at nga mga kaso batok sa suspek. (Camille Santos Naraga)(Source: DCPO)