Davao del Norte — Miabot sa P27.6 milyon ang kantidad sa shabu nga nakompiska sa kapulisan sa usa ka coordinated operation sa Barangay Francisco, Panabo City, niadtong Disyembre 5, 2025.
Nadakpan sa joint operation ang duha ka suspek nga giilang high-value individuals (HVIs), alyas Gang ug alyas Cesar, pinaagi sa kooperasyon sa Panabo City Police Station, Davao Norte Provincial Intelligence Unit (DNPIU), 2nd DNPMFC, RPDEU 11, ug mga ahente sa PDEA Davao del Norte.
Nasakmit gikan sa mga suspek ang 4,060 gramos sa shabu, giputos sa nagkalain-laing plastic sachets, nga adunay estimated standard drug price nga ₱27,608,000.
Lakip usab sa nakompiska ang ₱1,000 marked money, ₱100,000 boodle money, usa ka black Manjaru backpack, ug dark-blue Jansport bag.
Anaa karon sa kustodiya sa Panabo City Police Station ang mga suspek ug nag-atubang sa kaso sa paglapas sa RA 9165 o Comprehensive Dangerous Drugs Act of 2002. . .(Camille Santos Naraga)(Source: Contributed)