DAVAO CITY – Nasakmit sa mga sakop sa Naval Forces Eastern Mindanao (NFEM) ang gibana-bana 800 ka master cases sa mga sigarilyong foreign brand nga gituohang gipalusot sa baybayon sa Dumoy Point, Barangay Talomo, niadtong Sabado, Hunyo 7, 2025.
Base sa ulat, nakit-an sa mga sakop sa nagpahigayon og marine patrol ang 20 ka mga indibidwal nga nagdiskarga og mga karton gikan sa usa ka bangka nga ginganlan MB “Sharefa.”
Sa dihang miabot ang tropa sa NFEM, nagpanagan ang mga indibidwal ug gibiyaan ang mga karton sa lugar.
Gibanabana nga ang kantidad sa mga nakumpiskang smuggled nga sigarilyo mokabat og P20 milyon. Ang mga kontrabando anaa karon sa kustodiya sa Naval Station Felix Apolinario sa Camp Panacan ug nakatakdang i-turn over ngadto sa Bureau of Customs (BOC) XI alang sa pormal nga disposisyon.(Camille Santos Naraga)(Source: Contributed)