DAVAO CITY — Nadakpan sa usa ka joint operation ang usa ka lalaki nga giingong nagbaligya og Philippine Ducks o dakit sa Facebook Marketplace sa kantidad nga ₱1,800 matag usa, human kini mareport sa usa ka estudyante.
Ang operasyon gihimo sa mga personahe sa DENR-12 PENRO-Cotabato, CENRO-Matalam, Regional Anti-Cybercrime Unit 12, ug Matalam Municipal Police Station niadtong Oktubre 23, 2025, sa buntag, sa daplin sa National Highway, Purok Maharlika, Barangay Bagontapay, M’lang, Cotabato Province.
Malampuson nga nadakpan ang suspek ug nakuha ang iyang ibaligya nga wild duck, nga nailhan nga usa ka klase sa endemic species sa Pilipinas.
Nasupak sa dinakpan ang Republic Act 9147 o ang Wildlife Resources Conservation and Protection Act, kalabot sa Republic Act 10175 o Cybercrime Prevention Act of 2012, tungod kay gigamit niini ang online platform aron makabaligya og binantayang hayop.
Ang dakit o Philippine Duck kay endemic lamang sa Pilipinas ug kasamtangang gilangkuban sa listahan nga “Vulnerable” species ubos sa Updated National List of Threatened Philippine Fauna and Their Categories.
Posibleng masilotan ang dinakpan og kapriso hangtod usa ka tuig o multa hangtud ₱100,000, sumala sa balaod.(Camille Santos Naraga)(Source: Contributed)