DAVAO CITY – Na-intercept sa Naval Forces Eastern Mindanao (NFEM) ang usa ka Jungkong-type watercraft nga nagdala og ₱43.5 milyon nga undocumented foreign-brand cigarettes duol sa Sta. Cruz, Davao del Sur kaniadtong Nobyembre 5, 2025.
Base sa tip sa usa ka residente, naglunsad ang SEAL Team ug mga patrol boats BA489 ug BA491 og Visit, Board, Search, and Seizure (VBSS) sa barkong M/L Fatima Shakira, nga wala motubag sa radio calls. Ang sakyanan, nga gipanag-iya ni Alsamer Jafaar sa Basilan ug gisakyan sa 12 ka crew, nasuta nga nagdala og 1,107 ka kahon sa smuggled cigarettes gikan sa North Sulawesi, Indonesia.
Gisundan ang barko paingon sa Naval Station Felix Apolinario sa Davao City, diin gisusi sa Bureau of Customs (BOC) ug PDEA-XI ang kargamento. Human sa inspeksyon, kini gihatag sa Bureau of Customs para sa tukmang disposisyon.
Giingon sa NFEM nga ang operasyon nagpakita sa ilang dedikasyon sa pagpugong sa smuggling ug sa pagpanalipod sa maritime borders sa Pilipinas.(Camille Santos Naraga)(Source: Contributed)