Gipresenta sa kapulisan sa mga sakop sa media ang suspetsado sa pagpatay sa 15 anyos nga babayeng estudyante sa Valencia City, Bukidnon niadtong Sabado sa hapon, Enero 10, nga nakasuot og super high cut ballistic helmet ug bulletproof vest alang sa seguridad.
Wala mihatag og bisan unsang pahayag ang suspek atol sa presentasyon ngadto sa media.
Sumala sa kapulisan, naaresto ang suspek nga giila kang Marlon Rosaut sayo sa buntag sa maong adlaw sa Purok 6, Sitio Buco, Barangay Banlag, Valencia City, pinaagi sa tabang sa mga miyembro sa lokal nga tribu.
Matod pa sa mga awtoridad, human makit-an ang lawas sa biktima nga si Jennifer Encarnacion niadtong Huwebes sa buntag, Enero 8, human kini gi-report nga missing sulod sa duha ka adlaw, dayong gilusad ang manhunt operation aron masikop ang responsable sa krimen. (Camille Santos Naraga)(Source: Contributed)