AGUSAN DEL SUR – Daghang high-powered firearms ug improvised explosive devices (IEDs) ang nakumpiska sa mga sundalo atol sa duha ka focused military operations nga gipahigayon sa Agusan del Sur ug Surigao del Sur niadtong Hulyo 18.
Sa report sa Philippine Army, unang narekober sa mga sakop sa 3rd Special Forces Battalion (3SFBn), 401st Infantry Brigade, 4th Infantry Division (4ID) ug 67th Infantry Battalion (67IB), 10th Infantry Division (10ID) ang unom ka high-powered firearms sa Barangay Kolambugan, Sibagat, Agusan del Sur. Lakip sa mga nakumpiska ang duha ka M16 rifles, duha ka AK-47 rifles, usa ka Garand rifle, ug usa ka homemade shotgun.
Sa laing operasyon nga gihimo sa Barangay Maitum, Tandag City, Surigao del Sur, nakarekober usab ang mga sundalo sa 3SFBn uban sa 36th Infantry Battalion ug Philippine National Police (PNP) og usa ka M16 rifle, duha ka anti-personnel IEDs, mga magasin, ug mga bala.
Sumala ni Brig. Gen. Benjamin Leander, Commander sa 401st Infantry Brigade, ang kalampusan sa operasyon resulta sa epektibong intelligence gathering ug sa impormasyon nga gihatag sa usa ka kanhi miyembro sa New People’s Army (NPA).
Samtang, giingon ni Maj. Gen. Marion Angcao, Commander sa 4th Infantry Division, nga ang padayon nga operasyon sa militar kabahin sa ilang paningkamot sa pagmintinar sa kalinaw ug seguridad sa rehiyon. Nagpasalamat usab siya sa suporta sa komunidad nga nakatabang sa malampusong implementasyon sa operasyon.(Camille Santos Naraga)(Source: Courtesy: 4th Infantry Division)