DAVAO CITY – Narekober sa mga sundalo sa 6th Infantry Battalion ang nagkalain-laing mga armas, bala, ug gamit-panggiyera human nila makaengkwentro ang gibana-banaang upat ka armadong terorista atol sa ilang regular combat patrol sa Barangay Penditen, Datu Salibo, Maguindanao del Sur niadtong Mayo 3, 2025.
Sa gihimong clearing operation pagkahuman sa engkwentro, nakuha sa militar ang usa ka M14 rifle, duha ka magazine, usa ka bandolier, duha ka caliber .45 pistol, ug ubang gamit.
Sumala sa mga sundalo, nakita sa lugar ang mga bakas sa dugo nga posible nga nagpasabot nga dunay nasamdan sa mga miikyas nga terorista.
Subay sa direktiba sa ilang mga opisyal, nagpabiling alerto ang tanang patrol bases sa ilang area of operations. Mas gipakusgan pa ang intel monitoring, checkpoint operations, ug ang nagpadayon nga pursuit operation batok sa mga armado.