DAVAO ORIENTAL — Padayong gi-atiman sa tambalanan ang usa ka menor de edad human gidunggab upat ka beses sulod mismo sa Mati National Comprehensive High School atol sa pagsaulog sa Foundation Day niadtong Hulyo 17, 2025 (Huwebes).
Ang biktima giila sa alyas “Marjun”, residente sa Sitio Tambiling, Barangay Central, ug miyembro sa usa ka gang nga misurender bag-ohay lamang sa kapulisan. Samtang ang suspek giila sa alyas “Ivar”, usa ka Grade 11 student sa maong tunghaan ug residente sa Purok Magapo, Brgy. Central, Mati City.
Sumala sa inisyal nga imbestigasyon, mibisita ang biktima sa iyang uyab sulod sa eskwelahan sa panahon sa kalihokan, apan kalit kini gidunggab sa suspek. Gihulagway nga ika-upat na kini nga higayon nga napasakitan siya, ug gitabangan pa kini og kulata sa laing mga tawo.
Sa pagkakaron, padayon pa nga ginapangita sa mga otoridad ang suspek, samtang gi-report nga gawas na sa peligro ang kahimtang sa biktima. (Camille Santos Naraga)(Source: Contributed)