DAVAO ORIENTAL – Patong-patong nga kaso ang giatubang karon sa usa ka magtiayon nga nadakpan sa operasyon sa National Bureau of Investigation (NBI) tungod sa pagpahimulos sa ilang kaugalingong anak pinaagi sa pagpapatigayon og cybersex den sa Lupon, Davao Oriental.
Ang mga suspetsado napasakaan og mga kasong qualified child trafficking, paglapas sa Republic Act 11930 o Anti-Online Sexual Abuse or Exploitation of Children and Anti-Child Sexual Abuse or Exploitation Materials Act, ug Republic Act 7610, o ang Special Protection of Children Against Abuse, Exploitation and Discrimination Act.
Gipresenta sa media ang mga suspetsado ni NBI-Davao Director Atty. Arcelito Albao karong adlawa, Hunyo 5, 2025. Matod ni Atty. Albao, kini ang unang natala nga kaso sa online sex trafficking sa lungsod sa Lupon, niadtong Hunyo 3, 2025.
Giluwas dayon ang mga biktima nga mga menor de edad ug gipaubos sa medico-legal check-up ug counseling pinaagi sa Recovery and Reintegration Program for Trafficked Persons (RRPTP) sa DSWD.
Padayon ang imbestigasyon samtang gipaniguro sa mga otoridad ang hustisya para sa mga biktima.(Camille Santos Naraga)(Source: Contributed)