KORONADAL CITY – Patay ang duha ka mag-uyab human silang maanod sa kusog nga tubig-baha samtang naligo sa Millennium Falls, Barangay Cacub, Koronadal City. Nahitabo ang insidente pagkahuman misaka kalit ang lebel sa tubig tungod sa kusog nga ulan sa palibot.
Ang mga biktima mao si Christian Pederiso, 28 anyos, usa ka online selling delivery rider, ug si Jessa Mae Huesca, 24 anyos, usa ka magtutudlo sa Mary Land School Incorporated. Pareho silang residente sa Barangay Paraiso, Koronadal City.
Sumala sa imbestigasyon, sakay sa motorsiklo ang duha padulong sa Purok Dam Site aron mag-swimming sa falls, apan naabtan sila sa kalit nga pagdagayday sa tubig nga nagresulta sa ilang pagka-anod.
Human sa pipila ka oras nga search operation, sunod-sunod nga napalgan sa mga emergency responders ang ilang mga lawas. Na-turn over na kini sa ilang pamilya pinaagi sa Koronadal City Disaster Risk Reduction and Management Office (CDRRMO).(Camille Santos Naraga)(Source: Contributed)