Davao del Sur — Nasikop sa mga pulis ang mag-asawang vendor nga ginadudahang nagbaligya og ilegal nga droga sa Barangay Sinawilan, Digos City.
Giila ang mga suspek nga sila alyas “Argie,” 36 anyos, giisip nga High Value Individual (HVI) sa illegal nga droga, ug ang iyang asawa nga si alyas “Fatima,” 36 anyos, pulos residente sa maong barangay.
Nadakpan ang mag-asawa atol sa usa ka buy-bust operation nga gilusad sa Provincial Drug Enforcement Unit (PDEU) kauban ang PDEA–Davao del Sur ug ang Drug Enforcement Unit sa Digos City Police Station.
Sumala sa report, nahitabo ang operasyon sa Purok Lapu-Lapu, Barangay Sinawilan, bandang alas 11:13 sa gabii sa Martes, Enero 13, 2026. Nakumpiskar gikan sa mga suspek ang gituohang shabu nga gibanabana og kantidad nga ₱32,640.
Matud pa sa kapulisan, si alyas “Argie” ang gituohang nagdumala sa pag-apod-apod sa ilegal nga droga sa iyang lugar ug sa kasikbit nga mga barangay sa Digos City.(Camille Santos Naraga)(Source: Contributed)