DAVAO CITY – Gipasakaan na og kasong Murder ug Frustrated Murder ang usa ka lalaki nga nanigbas sa iyang kaugalingong igsoon nga miresulta sa kamatayon niini, ug sa pagkasamad sa asawa ug anak sa biktima sa nahitabong insidente niadtong kaadlawong buntag sa Domingo, Hulyo 20, 2025, sa Purok 1-B, Baring, Barangay Wangan, Calinan District, Davao City.
Gingalan ang suspetsado nga si alyas “June,” 39 anyos, nga karon nag-atubang sa kaso human sa pagpanigbas sa ulo sa iyang manghod nga si “John,” 34 anyos. Sumala sa paunang imbestigasyon, selos ang gihisgotang motibo sa krimen, human giakusa ni June ang iyang igsoon nga adunay relasyon sa iyang asawa.
Nadamay usab ang asawa sa biktima nga giingong nasamdan sa ulo samtang naningkamot nga motabang sa iyang bana. Ang ilang 11-ka-buwan nga anak, naapil usab sa kasamok ug nasamdan.
Karon, anaa na sa kustodiya sa mga awtoridad ang suspetsado samtang nagpadayon ang imbestigasyon sa maong insidente.(Camille Santos Naraga) (Source: Contributed)