Patay ang usa ka 32-anyos nga lalaki human gipusil sa wala mailhing suspek sa Crossing Tagubay, Barangay Canayugan, Bayugan City, Agusan del Sur, alas-10:50 sa buntag niadtong Martes.
Giila sa kapulisan ang biktima nga si Rey., ulitawo ug residente sa Purok 6, Barangay De Oro, Butuan City.
Base sa inisyal nga imbestigasyon, nag-park lamang sa iyang motorsiklo sa daplin sa national highway ang biktima dihang kalit siyang giduol sa wala mailhing lalaki gikan sa likod ug gipusil gamit ang gituohang kalibre .45 nga armas.
Tungod sa grabeng samad nga naangkon, namatay dayon ang biktima sa maong hitabo.
Padayon pa karon ang imbestigasyon sa Bayugan City Police Station aron mailhan ug madakpan ang suspek ingon man matino ang motibo sa krimen. .(Camille Santos Naraga)(Source: Contributed)