DAVAO CITY – Padayong gitambalan sa ospital ang usa ka lalaki human kini gitukob sa usa ka buaya sulod sa Barangay Laih, Siay, Zamboanga Sibugay niadtong Abril 28, 2025.
Mikatag sa social media ang video nga nagtudlo sa lalaking gitangag ug gituyok-tuyok sa buaya nga nailhan sa ngalang “Lalay,” nga anaa sa sulod sa iyang kulungan.
Gibanabanang milungtad og pipila ka minuto ang insidente sa wala pa maluwas ang biktima.
Base sa imbestigasyon, misaka sa kural ang lalaki ug giduol ang buaya aron hikapon kini, tungod kay nagtuo siya nga dili kini tinuod. Apan, nahadlok siya sa dihang kalit siyang gitukob ni Lalay.
Gisiguro sa mga otoridad ang dugang seguridad sa lugar ug nagpahimangno sa publiko nga likayan ang pagduol sa mga hayop sa wildlife enclosures.(Camille Santos Naraga)(Source: Contributed)