DAVAO CITY — Nadakpan ang usa ka gitudlong drug den maintainer ug pito ka kauban niini sa gipahigayon nga joint anti-illegal drug operation sa Barangay Langhub, Patikul, Sulu, niadtong Huwebes, Oktubre 2, 2025.
Ang operasyon gipangulohan sa PDEA-Sulu Provincial Office uban ang mga elemento sa PNP ug Philippine Army.
Gikasa ang operasyon pinaagi sa buy-bust, diin nadakpan si alyas “Bating,” 35 anyos, nga gituohang nagpadagan sa maong drug den, uban ang iyang pito ka mga kauban sulod sa balay nga gihimong drug den.
Giila ang mga nadakpan nga sila alyas “Nursali,” 31; “Makiki,” 37; “Sahiron,” 40; “Albasir,” 22; “Aljasir,” 34; “Padih,” 23; ug “Jim,” 32 anyos.
Nakumpiska sa mga otoridad ang gituohang shabu nga adunay kabanglan nga ₱142,800, uban sa .45 caliber pistol ug mga bala nga nasakmit sulod sa maong drug den.
Padayon karon ang imbestigasyon sa PDEA-Sulu aron masuta ang mas lawom nga koneksyon sa mga nadakpan. .(Camille Santos Naraga)(Contributed)