Arestado sa mga otoridad ang usa ka 33-anyos nga driver nga nailhang alyas “Soy” human madakpan sa usa ka buy-bust operation nga gipahigayon sa Purok Bayanihan, Barangay Sainz, Mati City, Davao Oriental, alas 3:15 sa hapon niadtong Hunyo 17, 2026.
Sumala sa kapolisan, ang suspek giila usab nga usa ka regional top priority drug personality. Ang operasyon gilusad sa hiniusang pwersa sa Mati City Police Station, Provincial Intelligence Unit sa Davao Oriental Police Provincial Office (PIU-DOPPO), ug Philippine Drug Enforcement Agency (PDEA).
Nasakmit gikan sa suspek ang 128.30 gramos sa gituohang shabu nga adunay gibanabang kantidad nga ₱872,440. Lakip usab sa mga narekober ang marked money nga gigamit sa operasyon, digital weighing scale, improvised drug paraphernalia, mga walay sulod nga cellophane, ug uban pang personal nga mga butang nga gituohang nalambigit sa ilegal nga kalihokan sa droga.
Padayon ang imbestigasyon sa mga awtoridad samtang giandam na ang pagpasaka og kaso batok sa suspek tungod sa paglapas sa Republic Act 9165 o Comprehensive Dangerous Drugs Act of 2002.(Camille Santos Naraga)(Source: Contributed)